“Дарагія браты і сёстры ў Хрысце,

так, менавіта сёстры і браты ў Хрысце, нават калі ў Царкве не ўсе мы атрымалі аднолькавыя абавязкі.

Дзякуй, што дазволілі мне правесці гэты дзень з вамі. У Тэзэ мы ад пачатку крочым сінадальным шляхам. Мы адчуваем глыбокую сувязь з Царквою ў Нямеччыне. Штогод тысячы людзей, у асноўным маладзёнаў, прыязджаюць з Нямеччыны, каб далучыцца да нас. Рэгулярна нас запрашаюць на Katholikentag [1] і Kirchentag [2]. Некалькі Еўрапейскіх моладзевых Сустрэч, якія мы арганізуем ужо 45 гадоў, адбыліся ў Нямеччыне – апошняя прайшла два з паловай месяцы таму ў Ростаку. Гэта дазволіла нам убачыць знутры канкрэтнае становішча Цэркваў на секулярызаваным паўночным усходзе Нямеччыны.

У Тэзэ мы хочам сур’ёзна паставіцца да слоў прарока, якія мы прачыталі: “О, чалавек, сказана табе, што ёсць дабром, і чаго патрабуе ад цябе Пан: паступаць справядліва, любіць міласэрнасць і пакорна хадзіць перад тваім Богам”. Бог чакае ад нас справядлівасці. І трэба прызнацца, што мы не заўсёды так рабілі. Нашая Супольнасць таксама ўзрушаная выпадкамі злоўжыванняў, якія прымушаюць нас адважыцца пачаць усё спачатку. Гэта азначае размеркаванне большае колькасці абавязкаў паміж намі. “Паступайце справядліва” ды “любіце міласэрнасць” – мы таксама жадаем з добразычлівай лагоднасцю ва ўзаемаадносінах падысці да неабходных змен у арганізацыі нашага супольнага жыцця.

Шмат моладзі, якая прыязджае да Тэзэ, падбадзёрвае нас. Гэта вялікі дар, калі вы можаце суправаджаць іх у іх пошуках. У наш час многія пэўныя факты руйнуюцца, а ўсе мы зноў сутыкаемся з фундаментальнымі пытаннямі: для чаго варта жыць? Што падтрымлівае нас? Што не дазваляе нам падаць духам?

У Тэзэ прыязджаюць не толькі адданыя хрысціяне, але таксама багата людзей, якія сталі абыякавымі да Царквы. Яны таксама шукаюць сэнсу ў сваім жыцці і асабістага заангажавання. Часцяком мы здзіўляемся таму, наколькі важная для іх супольнасць і наколькі натуральна яны ўдзельнічаюць у супольнае малітве. Некаторыя знаходзяць там давер, а часам нават жывыя адносіны з Богам. Мы адчуваем, што Святы Дух здзяйсняе як унутранае аздараўленне, так і новую адкрытасць адно да аднаго палчас супольнае малітвы.

Гэты досвед заахвоціў мяне зрабіць прапанову два гады таму, падчас сустрэчы перад адкрыццём Сіноду па сінадальнасці ў Рыме: час ад часу супольна затрымлівацца. У адваротным выпадку, як мы можам, як кажа прарок Міхей, хадзіць «пакорна перад Богам»? У сінадальным працэсе непазбежна выказваюцца супрацьлеглыя пазіцыі. Але калі мы супольна спяваем, молімся і перабываем у цішыні, мы таксама перажываем сапраўдную еднасць у Хрысце, больш глыбокую, чым любы кансэнсус ці рознагалоссе.

Мая прапанова распачаць кастрычніцкі Сінод менавіта такім момантам паўзы і супольнага звароту да Хрыста здабыла прыхільнасць не толькі ў Рыме, але таксама ў праваслаўных Цэрквах і пратэстанцкіх супольнасцях, абшчынах і рухах. Такім чынам, праект набывае ўсё большыя абрысы. Ягоным дэвізам стала фраза “Разам | Сход народа Божага”. Такім чынам, кастрычніцкі Сінод распачнецца экуменічнай малітвай увечары 30 верасня на плошчы Святога Пятра, на якую запрашаюцца ўсе ахвотныя. Удзел у ёй возьме пантыфік і прадстаўнікі розных Цэркваў. Будзе вельмі сціпла: са спевамі з Тэзэ, чытаннем Святога Пісання, цішынёй і малітвай вернікаў, падобна як падчас «ночы святла», арганізаванай у шэрагу абшчын Нямеччыны, а таксама падчас Адвэнту. Моладзь ва ўзросце ад 18 да 35 гадоў запрашаецца не толькі да ўдзелу ў вечаровае малітве, але й да ўдзелу ў мерапрыемствах цягам выходных у парафіях і рэлігійных супольнасцях Рыма.

Папа Францішак абвясціў гэтую экуменічную вячэрнюю малітву 15 студзеня, кажучы з гэтае нагоды: “Шлях да адзінства хрысціянаў і сінадальны шлях Касцёла ўзаемазвязаныя”. Праз некалькі дзён пасля гэтага на прэс-канферэнцыі пастар Крысціян Крыгер, прэзідэнт Канферэнцыі Еўрапейскіх Цэркваў і Пратэстанцкай федэрацыі Францыі, падкрэсліў, наколькі новым для экуменізму з’яўляецца тое, што Касцёл перад прыняццем важных рашэнняў просіць іншых аб падтрымцы і заступніцтве.

Я вельмі сардэчна запрашаю вас, як удзельнікаў Сінадальнага шляху, на гэты «Сход народа Божага». Ваш удзел быў бы моцным сведчаннем нашае узаемазалежнасці. Я ўсведамляю, наколькі насычанамі з’яўляюцца вашыя планы, а перад абліччам усіх надзённых праблем у Касцёле і ў свеце пілігрымка ў Рым з супольнае вечаровае малітваю могуць падацца смешнымі. Але, магчыма, нам патрэбна менавіта тое, што не мае непасрэднае мэты, дзеля таго, каб адкрыцца на нешта істотнае. Хто ведае? Святы Дух можа здзівіць нас.

Няхай Бог дабраслаўляе тую велізарную працу, якую вы здзейснілі на Сінадальным шляху. Зараз я хацеў бы запрасіць вас затрымацца перад абліччам Божае прысутнасці і ўшанаваць тыя некалькі хвілін супольным маўчаннем.

Я быў бы ўсцешаны ўсім сэрцам, калі б вы прынялі маё запрашэнне і калі б мы зноў сустрэліся ў Рыме”.

“Сярод тых, хто стаў ахвярай злоўжыванняў і кантролю ў Царкве, ёсць і такія асобы, каторыя пацярпелі ад гвалту з боку братоў у нашае Супольнасці. На Сінадальным шляху ў Франкфурце прысутнасць «Рады ахвяр» (Betroffenen Beirat) яшчэ раз паказала мне, наколькі істотна размяшчэнне голасу зацікаўленых людзей у цэнтры ўвагі. Без іх сведчанняў, таксама ў Тэзэ, мы б ніколі не даведаліся аб сур’ёзнасці пакут людзей, якіх гэта датычыць. Мы ўдзячныя ім за тое, што яны знайшлі ў сабе смеласць расказаць пра гэта. Я хацеў яшчэ раз паўтарыць тое, таму што ў маім выступе гэта было выказана недастаткова выразна”.

Пра любую агрэсію, даўняю ці нядаўняю, здзейсненую супраць непаўнагадовага або дарослага, ці то з боку брата, які злоўжываў сваім маральным статусам, ці то з боку якой-небудзь іншай асобы, можна паведаміць на адрас электроннай пошты protection taize.fr, або ў асацыяцыю пацярпелых, або на нацыянальны нумар тэлефона, кантактныя дадзеныя якога пададзены на гэтае старонцы.

Здымак: Synodaler Weg / Maximilian von Lachner

Чарговы этап па падрыхтоўцы гэтага беспрэцэдэнтнага экуменічнага мерапрыемства, у якім ужо ўдзельнічаюць каля шасцідзесяці партнёраў з розных канфесій, адбудзецца з 12 па 15 сакавіка ў Рыме. Абвяшчаючы мерапрыемства 15 студзеня, папа Францішак запрасіў «братоў і сясцёр усіх хрысціянскіх канфесій узяць удзел у гэтым «Сходзе народа Божага» (поўны тэкст).

Перад тым, як прыехаць у Рым, у панядзелак 6 сакавіка брат Алоіс наведаў у Жэневе Генеральнага сакратара Сусветнай рады Цэркваў вялебнага Джэры Пілэя, а таксама Генеральную сакратар Сусветнае лютэранскае федэрацыі вялебную Анне Бургхардт. Яму таварышылі каля шасцідзесяці маладзёнаў, якія зараз знаходзяцца на валантарыяце ў Тэзэ.

У мінулую пятніцу ўвечары, 12 сакавіка, брат Алоіс выступіў на пятай і заключнай асамблеі нямецкага Сінадальнага шляху ў Франкфурце; разважанне, дало яму магчымасць падкрэсліць духоўнае вымярэнне сінадальнага працэсу.

Інфармацыя для прэсы

Больш дэталёвую інфармацыб пра сустрэчу «Разам | Сход народа Божага» можна атрымаць, пішучы на адрас.
Інфармацыю наконт Абшчыны Тэзэ можна атрымаць, пішучы на адрас.

Здымак (C) Vatican Media

Адвечны Божа, хвала табе! Ты заклікаеш нас крочыць за Езусам Хрыстом. Ты прагнеш, каб праз нашае братэрскае жыццё мы былі ўзорам той еднасці, якую Хрыстус прынёс усяму чалавецтву.

Мы давяраем Табе усё, што мы абмяркоўвалі цягам апошніх некалькіх дзён – дабрыню, так неабходную для нашага супольнага жыцця, сумесную адказнасць і супрацоўніцтва паміж намі, жаданне пашыраць нашыя сяброўскія адносіны, каб спрыяць пошуку новага аблічча Царквы. Мы молімся, каб Ты абдарыў нас сэрцамі, адкрытымі на тое, каб гэтыя размовы прынеслі плён.

Мы дзякуем Табе за нашых братоў у фратэрніях, у жыцці якіх Евангелле прысутнічае ў самых розных сітуацыях. Пакажы нам, як нашыя брацтвы могуць развівацца ў зменлівым свеце і ў адпаведнасці са зменамі, якія перажывае нашая Супольнасць.

Навучы нас лепш прыслухоўвацца да шэпту Твайго Святога Духа, які гучыць унутры нас і ў нашым абшчынным жыцці. Умацуй нашую веру ў прысутнасць і моц Твайго Духа, які заўсёды ажыўляе нашае пакліканне. Твой Дух – крыніца, якая не перасыхае. Дапамажы нам чэрпаць з гэтае крыніцы адважныя рашэнні, якія дазволяць заўсёды абнаўляць спадчыну нашае Супольнасці ў нашым імкненні дасягнуць супольнае справы, якая падтрымліваецца ўсімі братамі.

Твой Святы Дух вядзе нас да выслухоўвання адно аднаго. Ты даў нам магчымасць перажыць гэта ў гэтыя дні нашае Нарады. Праз слуханне адно аднаго Ты даеш нам новыя ідэі і мужнасць прымяняць іх на практыцы.

Мы давяраем Табе ўсё, што будзе часткаю нашага абшчыннага жыцця ў гэтым годзе, з упэўненасцю, што Ты будзеш кіраваць намі ў будучыні, як й рабіў тое дагэтуль. Захоўвай нас у радасці і ў духу шчодрасці.

Мы даручаем табе ўсю Царкву, праект “Разам – Сход народа Божага”, паездкі братоў у інтэнцыі дасягнуць моладзі на розных кантынентах, сустрэчы ў Тэзэ, Любляне ды іншых месцах, а таксама душпастырскія ініцыятывы, якія нашы браты будуць прадпрымаць у фратэрніях.

І мы горача давяраем Табе ўсіх тых, хто нясе цяжкія раны, ахвяр вайны ва Украіне і ў іншых месцах, ахвяр сексуальнай агрэсіі і духоўнага гвалту, мігрантаў, тых, хто пакутуе ад змены клімату, хворых і ўсіх тых, пра каго забыліся ў нашых грамадствах.

Божа любові, у Хрысце Ты даеш нам жывую надзею. Учыні, каб мы былі вернымі сведкамі гэтага.

Відэа з гэтай вечаровай малітвы:

Смерць папы-сеньёра Бэнэдыкта XVI кранае нашыя сэрцы ў Тэзэ, таму што нашая Супольнасць трывала ў адносінах з ім больш за паўстагоддзя. Па сутнасці, Ёзэф Ратцынгер і брат Ражэ ведалі адзін аднаго ўжо з часоў Другога Ватыканскага сабору, дзе адзін з іх быў вучоным экспертам (peritus), а другі – назіральнікам.

 

Памятаю, як я жыў з братам Ражэ ў доме тэолага, які стаў арцыбіскупам Мюнхена, падчас моладзевае сустрэчы, якую мы падрыхтавалі ў гэтым горадзе. Ён гасцінна прыняў нас у сваім доме.

 

Пазней, калі брат Ражэ штогод ездзіў у Рым на сустрэчу з папам Янам Паўлам ІІ, ён часта наведваў кардынала Ратцынгера, у той час прэфекта Кангрэгацыі Веравучэння, каб мець магчымасць глыбокага абмена думкамі з кардыналам.

 

Апошні ліст, напісаны братам Ражэ за тры дні да яго забойства, быў адрасаваны новаму пантыфіку Бэнэдыкту XVI, каб паведаміць яму, што яго – брата Ражэ – сталы ўзрост не дазваляе яму паехаць на СДМ у Кёльн, але што ён як мага хутчэй прыбудзе да Рыму, каб прывітаць яго. Гэты ліст Папа трымаў у руках падчас агульнай аўдыенцыі ў сераду, калі са смуткам паведаміў аб трагічнай смерці заснавальніка нашай Супольнасці. Ён вельмі паважаў брата Ражэ, а праз пяць гадоў пасля яго смерці напісаў: “Няхай яго сведчанне аб экуменізме святасці натхняе нас на нашым шляху да адзінства”.

 

Асабіста я вельмі ўдзячны за той прыём, які аказаў мне Бэнэдыкт XVI, калі я скіраваўся на сустрэчу з пантыфікам праз некалькі месяцаў пасля пачатку маёй новай паслугі ў якасці прыёра нашае Абшчыны. У тым жа 2005 годзе памёр і Ян Павел ІІ, і брат Ражэ. Як будуць развівацца адносіны нашае Супольнасці з новым пантыфікам? Ужо з моманту першай аўдыенцыі я зразумеў, што атрымалася заваяваць ягоны давер да нас, а я штогод змагу ездзіць да яго. Тады ён сказаў мне: “У Тэзэ вы маеце спевы ды цішыню, вы ідзяце з моладдзю да істотнага, да асабістых адносін з Богам”. І для яго, і для нас гэта было вельмі важна.

 

Кульмінацыяй адносін з ім стала супольная малітва, якую мы арганізавалі ў яго прысутнасці 29 снежня 2012 г. падчас нашае Еўрапейскай моладзевае Сустрэчы ў Рыме. Звяртаючыся да тысячаў маладзёнаў, якія сабраліся на плошчы св. Пятра, Бэнэдыкт XVI між іншым сказаў: “Запэўніваю вас у непарушным абавязацельстве Каталіцкага Касцёла працягваць пошукі шляхоў прымірэння, каб дасягнуць бачнага адзінства хрысціянаў”.

 

Праз некалькі тыдняў ён пакінуў трон апостала Пятра, а я ў наступным годзе вырашыў сустрэцца з ім ужо на пенсіі, каб падзякаваць яму за нязменную падтрымку, якую ён заўсёды аказваў нашай Абшчыне ў яе пакліканні.

Здымак: (C) Servizio Fotografico dell’Osservatore Romano | Vatican Media

Тэзэ • Прэс-рэліз | Пятніца, 19 жніўня 2022 г.

Пасля двух гадоў перыяду пандэміі міжнародныя сустрэчы ў Тэзэ вярнуліся да свайго звычайнага рытму. Ад Вялікадня больш за 20 000 маладых людзей пабывалі ў вёсцы, каб тыдзень за тыднем удзельнічаць у прапанаваных намі мерапрыемствах: супольных малітвах, малых дыскусійных групах, тэматычных семінарах, практычных заданнях.

Канец лета адзначаны выключным візітам: у суботу, 27 жніўня, з афіцыйным візітам Абшчыну Тэзэ наведвае спадарыня Урсула фон дэр Ляен, старшыня Еўрапейскае камісіі. Падчас свайго візіту яна адбывае сустрэчу з братамі ды вядзе дыялог з моладдзю, прысутнай на гэтым тыдні ў вёсцы. У суботу, 27 жніўня, а 17:30 адбываецца яе публічная лекцыя аб еўрапейскіх справах.

На гэтым адмысловым тыдні для маладых людзей ад 18 да 35 гадоў нашыя госці вядуць спецыяльныя тэматычныя семінары. Сярод выступоўцаў эксперты ў розных галінах, навукоўцы, палітычныя лідэры — поўную праграму спецыяльнага тыдня можна знайсці на нашае старонцы. Для жадаючых у межах спецыяльнага тыдня прапанаваная адмысловая праграма па захаванні біяразнастайнасці.

Кажа брат Алоіс: “Нашым прагненнем як Супольнасці ёсць тое, каб усе маладыя людзі, якія прыязджаюць у Тэзэ, маглі адчуць, што давер Богу дапамагае знайсці ім сэнс свайго жыцця ды ўзяць на сябе адказнасць па вяртанні дадому. Візіт Урсулы фон дэр Ляен з’яўляецца важным момантам, які сведчыць аб тым, што памкненні і абавязацельствы маладога пакалення пачутыя і прынятыя да ўвагі палітычнымі лідэрамі ды інстытутамі. З гэтае перспектывы дадзены візіт, ва ўмовах сур’ёзных крызісаў цяперашняга часу, варта лічыць за знак надзеі”.

Коратка аб іншых навінах:

• • У суботу, 20 жніўня, у рамках “Тыдня абмену думкамі ды сведчання аб праваслаўнае веры” ў Тэзэ мае месца спецыяльны дзень: з Парыжа прыбывае мітрапаліт Дзімітрый, каб а 9-ае гадзіне раніцы цэлебраваць у Храме Паяднання Боскую Літургію.

• • Чарговая Еўрапейская сустрэча пройдзе з 28 снежня б.г. па 1 студзеня 2023 года ў Ростаку на поўначы Германіі, на ўзбярэжжы Балтыйскага мора.

• • Мы працягваем надаваць аўдыё-трансляцыю з вечаровае супольнае малітвы штодня ў простым эфіры на старонцы Тэзэ, а таксама суботнюю вечаровую малітву ў відэа-фармаце.

Акрэдытацыя СМІ

Дзеля таго, каб атрымаць здымкі з моладзевых сустрэч гэтым летам у Тэзэ альбо запытаць аб магчымасць інтэрв’ю з братамі Абшчыны ці валанцёрамі, пішыце нам на адрас media taize.fr.

З 10 па 12 ліпеня на запрашэнне Супольнасці Тэзэ адбылася сустрэча, якая сабрала прадстаўнікоў некалькіх нацыянальных моладзевых службаў і каталіцкіх рухаў, якія займаюцца экуменізмам, а таксама прадстаўнікоў пратэстантаў і англікан. Размовы былі засяроджаны вакол пытання: як сінадальны шлях, які праходзіць у Каталіцкім Касцёле, можа стаць моцным момантам пры пошуку еднасці паміж хрысціянамі і ўсёй чалавечай сям’ёй, ды як заахвочваць да ўдзелу ў гэтым працэсе моладзь?

З боку ўдзельнікаў між іншым прамаўлялі с. Наталі Бекар XMCJ (Xavieres Missionaries of Christ Jesus) з Сакратарыята Сіноду; дамініканін Гіяцынт Дэстывель з Дыкастэрыі спрыяння хрысціянскаму адзінству; а. Жаао Шагас з Дыкастэрыі па справах свецкіх, сям’і і жыцця; брат Алоіс, прыёр Тэзэ. Гэтыя дні дазволілі нам перабываць разам у вялікае разнастайнасці ды ў надзеі на еднасць.

Першаю тэмаю, якая абмяркоўвалася, была вайна ва Украіне ды ініцыятывы салідарнасці Тэзэ, адрасаваныя для ўкраінскіх уцекачоў. Пасля гэтага брат Алоіс прамовіў перад сінадальным працэсам, які зараз трывае ў Каталіцкім Касцёле. Акрамя таго прыёр таксама змог падзяліцца з папам Францішкам некаторымі навінамі з жыцця Супольнасці ды распавёў пра экуменічныя ініцыятывы Тэзэ.

Цягам бліжэйшых некалькіх дзён брат Алоіс будзе мець дадатковыя сустрэчы з царкоўнымі іерархамі ў Рыме. Акрамя таго, у бліжэйшыя дні ў Рыме адбудуцца дзве малітвы са спевамі Тэзэ. У аўторак, 22 сакавіка, а 21-ае гадзіне ў касцёле Santa Maria in Campitelli ды ў сераду, 23 сакавіка, а 12:30 у бельгійскім нацыянальным касцёле San Giuliano dei Fiamminghi (via del Sudario 40). На малітве будуць прысутнічаць брат Алоіс ды некалькі іншых братоў.

(C) Здымак Vatican Media

Зваротная сувязь

media taize.fr

Прапанаваны расклад часу малітвы

Спеў

Laudate omnes gentes альбо Славіте всі народи

Малітва брата Алоіса

Езу Хрысце, стоячы ў цішыні перад Табою, мы дазваляем узняцца гэтай гарачай малітве: каб спыніўся збройны агонь на зямлі Украіны! Прымі ў сваёй любові тых, хто памірае ад гвалту і вайны, суцеш сем’і ў жалобе, пакажы сваю прысутнасць тым, хто знаходзіцца ў пакутах або каму давялося стаць бежанцам. Падтрымлівай тых, хто хоча міру і хто ва Украіне, РФ, Беларусі ды ў іншых краінах выступае з ініцыятывамі па спыненні вайны. Перад абліччам незразумелых пакутаў, мы ўсё ж верым, што Твае словы любові й міру ніколі не прамінуць. Ты аддаў сваё жыццё на крыжы і адкрыў для нас будучыню, якая існуе нават па-за межамі смерці. На нашым шляху да Вялікадня святло Твайго ўваскрасення будзе весці нас нават пасярод цемры, нагадваючы нам, што зло ніколі не будзе мець апошняга слова. Мы просім Цябе: дай супакой на нашыя часы. Ты наша надзея.

Псальм

Паміж кожнай страфою мы можам спяваць Bonum est confidere.

Дакуль, о Божа, лаяцца будзе Твой вораг?
Ці вечна зняважаць будзе вораг імя Тваё?
Чаму стрымваеш руку Тваю і правіцу Тваю?

Бог ёсць Цар мой спрадвеку,
што ўспамогу даваў на зямлі.
Ты выкрасаў крыніцу й паток,
Ты высушыў рэкі мнагаводныя.

Твой ёсць дзень і ночка Твая:
Ты стварыў святло і сонца.
Ты ўсе межы назначыў зямлі;
лета й зіму — Ты іх стварыў.

Не аддай зверу лютаму душу турка твайго;
не забудзь навекі грамаду бяздольнікаў Тваіх.
Глянь на запавет,
бо сховішчы зямлі напоўніліся шатрамі гвалту.

Няхай прыгнечаны не вяртаецца асаромленым,
бедны і ўбогі няхай славяць імя Тваё.
Паўстань, о Божа, Вядзі справу Тваю!
Успомні знявагі штодзённыя, што церпіш ад неразумнага.

Фрагмент са Святога Пісання

Благаслаўлёны Бог і Айцец Пана нашага Езуса Хрыста, Айцец міласэрнасці і Бог усякага суцяшэння, які суцяшае нас ва ўсякім смутку нашым, каб мы маглі суцяшаць усіх засмучаных тым суцяшэннем, якім Бог суцяшае нас саміх.

Спеў
Dona nobis pacem

Цішыня

Малітва вернікаў

Паміж кожнай з малітоўных інтэнцый мы можам праспяваць Kyrie 10.

1. За ўсіх, хто жыве ва Украіне. За ахвяр вайны ды за іх блізкіх, што перабываюць у жалобе, за параненых.
2. За сем’і, моладзь і дзяцей, састарэлых людзей, якія пакутуюць ва ўмовах выбухаў.
3. За тых, каму давялося пакінуць месца жыцця, выгнаных, бежанцаў, перасяленцаў, а таксама за ўсіх, хто іх прымае.
4. За найбольш уразлівых людзей, якім няма куды ісці й якія бездапаможна церпяць з-за наступстваў вайны.
5. За кіраўнікоў народаў і ўсіх тых, хто ў стане паўплываць на ход падзей, каб агонь як мага хутчэй спыніўся.
6. За кіраўнікоў Цэркваў, каб яны ўмелі суправаджаць усіх тых, каго закранула гэтае страшэннае выпрабаванне.
7. За міратворцаў. За ўсіх тых, хто ва Украіне, РФ, Беларусі ды іншых краінах заангажаваныя ў справу прасоўвання дыялогу й справядлівасці.

Ойча наш

Малітва дабраслаўлення

Ты дабраслаўляеш нас, Езу Хрыстэ, Ты, які з’яўляешся нашым супакоем і нашай надзеяй.

Спевы

Exaudi orationem meam | Frieden, Frieden | Jésus le Christ | Veni sancte Spiritus

За апошнія некалькі гадоў багата ўкраіснкае моладзі ўдзельнічала ў еўрапейскіх сустрэчах Пілігрымкі Даверу. Апошнім часам многім сем’ям, асабліва маці з дзецьмі, прыйшлося тэрмінова пакінуць сваю краіну, каб знайсці прытулак у іншым месцы. У многіх месцах заўважны рух салідарнасці, каб прыняць гэтых людзей, таму Тэзэ жадае падтрымаць гэты імпульс.

Застаючыся на сувязі з нашымі сябрамі ва Украіне ды ў суседніх краінах, з ініцыятывамі салідарнасці, а таксама з амбасадай Украіны ў Парыжы, мы прапануем мясцовым парафіям або групам падрыхтавацца да іх прыёму. Разам з тым мы прагнем звярнуць увагу тых, хто гатовы прыняць бежанцаў:

• пакуль што мы збіраем прапановы, але не можам гарантаваць, што сапраўды сям’я будзе знойдзена неадкладна. Цяжка ацаніць маштаб будучых прыездаў;
• таксама цяжка зразумець, як доўга гэтыя сем’і будуць мець патрэбу ў вашае шчодрае падтрымцы;
• для адной асобы ці нават сям’і такі прыём можа быць звязаны з празмернымі намаганнямі. Будзе значна лепей скаардынавацца з кім-небудзь яшчэ, каб узяць на сябе гэты абавязак ў парафіі або групе людзей;
• нарэшце, Тэзэ праз гэтую ініцыятыву дапамагае звязваць людзей адно з адным, але не можа ўдзельнічаць у канкрэтных сітуацыях або аказваць дапамогу ці спрыяць далейшымі дзеяннямі.

Калі ласка, старанна запоўніце форму прымаючае асобы па-ангельску альбо па-французску. Калі ў вас засталіся якія-небудзь іншыя пытанні, пішыце нам на гэты адрас.

Шчыра дзякуем вам за вашае заангажаванне!

Ва Украіне зло не будзе мець апошняга слова

Сёлета перыяд Вялікага посту пачынаецца ў той момант, калі кантынент Еўропы ахапіла вайна. Гэтая трагічная навіна пагружае нас у таямніцу зла. Сам Езус спазнаў гэты канчатковы досвед, калі добраахвотна на крыжы згадзіўся адмовіцца ад свайго жыцця: Ён прайшоў да канца праз шлях пакуты. На нашае дарозе да Вялікадня нас падтрымлівае гэтая надзея: па-за крыжам, праз Уваскрасенне Хрыста, Бог адкрыў шлях жыцця для ўсяго чалавецтва.

Як тое магчыма, што агонь зброі і бомбаў раздзірае народы, якія ў многіх адносінах так блізкія адно аднаму? У многіх сем’яў ёсць сваякі па абодва бакі мяжы... Падчас пілігрымкі ў РФ, Беларусь і Украіну ў 2015 годзе з невялікай групай маладых людзей з розных краін я стаў сведкам гэтага, калі наведаў у кіеўскім шпіталі некалькі ўкраінскіх салдат, параненых у баі. Была з намі маладая дзяўчына з РФ. Некалькі дзён таму, калі пачалася вайна, гэтая маладая расіянка ўзгадала той візіт ды распавяла наступную гісторыю: “Калі я ўвайшла у той шпіталь, мяне паралізаваў страх і сорам. Спачатку мне было цяжка штосьці сказаць. Потым я пачала распавядаць, што ў дзяцінстве кожнае лета ездзіла да дзеда ва Украіну, што мой стрыечны брат нарадзіўся ва Украіне. Тады ўкраінскія салдаты пачалі мяняцца: адзін з іх раптам сказаў, што яго жонка з РФ, потым другі, што яго бацькі жывуць у РФ... І стала зразумела, што насамрэч мы вельмі блізкія, што мы як браты і сёстры”.

Будзем маліцца, каб гэтае насенне ўзаемнага абмену ды лучнасці не было вырвана з карэннем вар’яцтвам вайны, але каб у доўгатэрміновай перспектыве яно аказалася мацнейшым за бессэнсоўны гвалт. Выказваць такое пажаданне яшчэ заўчасна, бо з кожным днём становіцца ўсё больш ахвяр і параненых. Таму варта ў глыбіні нашых сэрц захоўваць упэўненую надзею, што зло не будзе мець апошняга слова.

Папа Францішак заклікаў да дня посту і малітвы ў Папяльцовую сераду. У шэрагу месц па ўсім свеце вернікі збіраюцца і моляцца ў інтэнцыі супакою. Некалькі дзён таму мы атрымалі паведамленне ад праваслаўнага святара з РФ: аб супакоі моляцца й у яго прыходзе.

Таму, каб перажыць гэты Велікапосны час у жэсце салідарнасці з тымі, хто пакутуе ад вайны, якая шалее ва Украіне, памолімся за ахвяраў ды іх сем’і ў жалобе, за параненых, за тых, каму давялося ўцякаць, за тых, хто хацеў бы гэта зрабіць, але не змог, а таксама за ўсіх тых, хто вырашыў пазаставацца там, дзе жыве. Падумайма пра найбольш уразлівых людзей, якія першымі пацерпяць ад наступстваў узброенага канфлікту, пра дзяцей, якія ўжо пацярпелі, пра маладых людзей, якія не бачаць будучыні.

У нашае малітве не забываймася прасіць Святога Духа натхніць кіраўнікоў народаў і ўсіх тых, хто можа паўплываць на ход падзей, каб агонь зброі як мага хутчэй спыніўся. Памолімся, каб вайна не ўзмацніла падзелы ўнутры Цэркваў і сем’яў, і каб кіраўнікі Цэркваў ішлі поруч з усімі, хто пацярпеў ад гэтага страшнага выпрабавання. Прымаючы да ўвагі, што ў вачах Бога важыцца кожнае чалавечае жыццё, падумайма пра камбатантаў з усіх краін-удзельніц, а таксама пра іх сем’і, напрыклад, пра бабуль, якія бачаць, што ўнукі ідуць на фронт, на вайну, якую яны не выбіралі і якой не хацелі. Магчыма, пэўнага дня яны выйдуць на вуліцы пратэставаць...

Паколькі гэты перыяд Вялікага посту пачынаецца ў змрочным святле, мы пакліканыя пражыць наступныя сорак дзён у еднасці з тымі, хто пацярпеў ад гвалту не толькі ў Еўропе, але і ва ўсім свеце. На крыжы Хрыстус распасцёр свае рукі, каб ахапіць усё чалавецтва. Чалавецтва, якое занадта часта бывае разарваным, але ў Божым сэрцы застаецца назаўсёды аб’яднаным.

2 сакавіка, серада

Падтрымліваючы ініцыятыву посту й малітвы, прапанаванаю папам Францішкам, Абшчына Тэзэ прыме ўдзел у малітве за мір ва Украіне ў сераду, 2 сакавіка.

26 лютага, субота

Вечаровую малітву ў гэты дзень папярэдзіла доўгае і вымоўнае маўчанне ў інтэнцыі супакою ва Украіне, катораму папярэднічала наступная малітва, якую прамовіў брат Алоіс:

Уваскрослы Хрысце, перабываючы перад Табою ў маўчанні, узносім гэтую палымяную малітву: няхай спыніцца абстрэл украінскае зямлі! Прытулі сваёю любоўю тых, хто памірае ад гвалту і вайны, суцеш сем’і ў жалобе, падтрымай тых, каму давялося стаць на дарогу выгнання. Сутыкнуўшыся з незразумелымі пакутамі, мы па-ранейшаму верым, што Твае словы любові й супакою ніколі не прамінуць. На крыжы Ты аддаў сваё жыццё і адкрыў нам будучыню, нават за межамі смерці. Таму мы просім Цябе: дайце нам свой супакой. Ты наша надзея.

Напрыканцы часу маўчання ўсе прысутныя заспявалі па-ўкраінску “Славіте всі народи”.

24 лютага, чацвер

У сувязі з ваеннымі дзеяннямі ва Украіне, падчас малітвы апоўдні ў чацвер, 24 лютага, брат Алоіс прамовіў наступныя словы:

Божа любові, мы збянтэжаны гвалтам у нашым свеце, і асабліва цяперашнімі ваеннымі дзеяннямі ва Украіне. Дазволь нам быць салідарнымі з тымі, хто пакутуе і жыве сёння ў страху ды трывозе. Падтрымай надзею ўсіх тых, хто ў гэтай улюбёнай частцы свету шукае справядлівасці ды супакою. Спашлі Святога Духа, Духа міру, каб натхніць лідэраў народаў і ўсіх людзей.

У гэтую пятніцу, 25 лютага, а 20-ае гадз. (а 22-ае гадз. часу беларускага) браты і ўся моладзь, якая знаходзіцца ў Тэзэ, будуць у цішыні маліцца ў інтэнцыі супакою. Жадаючыя прыняць удзел у гэтае малітве змогуць далучыцца дзякуючы простай трансляцыі.

Супольная малітва падчас Сустрэчы Тэзэ ва Львове, 30 красавіка 2018 г.

Хрыстэ Езу, славім Цябе ўсім сэрцам. Ты хочаш учыніць нас сведкамі Божае любові ў разгар вялікіх змен, якія адбываюцца ў грамадстве і ў Царкве. І таму мы дзякуем Табе за дар адзінства, які Ты даеш нашай маленькай Абшчыне: гэта неацэнны скарб, пра які мы хочам клапаціцца.

Гэты скарб шматгранны. Мы дзякуем Табе за тое, што падчас нашае Нарады ў гэтыя апошнія некалькі дзён Ты суправаджаў нас, каб мы змаглі выявіць нашую вялікую разнастайнасць. Ты спасылаеш нам Святога Духа, які дае жыццё і заахвочвае да крэатыўнасці кожнага з нас, які яднае нас у Божае любові. Учыні, каб мы паверылі ў прысутнасць Духа.

Ты, Хрыстэ, подыхам даеш нам Твайго Духа ў малітве і ў нашым братскім жыцці, якое з’яўляецца яшчэ адным месцам, дзе мы знаходзім крыніцу Тваёй прысутнасці. Такім чынам, пасярод намаганняў адносна клопату пра нашае жыццё як братоў, далейшага выхаджэння па-за сябе і прымання іншых, Ты перадаеш нам сваю радасць, радасць Уваскрослага.

Мы прадстаўляем Табе ўсё тое, што казалі адзін аднаму падчас Нарады. Няхай нашае дзяленне прынясе плён. Дапамажы нам надаль ставіць нам самім пытання аб шматкультурнасці сярод нас, аб асабістым духоўным суправаджэнні, аб нашае сумеснае адказнасці за ўсё нашае жыццё праз нашыя шматлікія задачы і дзейнасць, а таксама праз наш пошук хрысціянскага адзінства. Напоўні нас гнуткасцю і мужнасцю, каб прыслухоўвацца да Святога Духа, каб рухацца наперад у гэтых ды шэрагу іншых сферах.

Езу Хрыстэ, Ты пасылаеш нас у свет. Хвала Табе за нашых братоў, якія жывуць у брацтвах у розных краінах. Мы дзякуем Табе за манашак, якія жывуць побач з намі і з якімі мы разам рухаемся наперад. Мы дзякуем Табе за сяброўства з такой колькасцю жыхароў нашага рэгіёну. Мы дзякуем Табе за мігрантаў, якіх тут прынялі і якія ўсё больш і больш прыстасоўваюцца да жыцця ў нашае краіне. Хвала Табе за маладзёнаў, якія прыедуць у Тэзэ на працягу наступнага года. Хвала Табе за Пілігрымку Даверу, якая, нібы струмень, пракладвае дарогу па свеце, з чарговымі этапамі на Блізкім Усходзе і ў Святой Зямлі.

Але мы таксама прызнаемся Табе, Езу Хрыстэ, што здарылася так, што мы не выканалі волю Тваёй любові. У прыватнасці мы давяраем Табе людзей, якія сталі ахвярамі сексуальнага або псіхалагічнага гвалту ці агрэсіі ў Тэзэ. Перабывай з імі ў іх самотнасці ды загой іх раны. Дадай нам адвагі выслухаць іх пакуты, прыслухацца да таго, пра што яны просяць і да іх парадаў, і зрабіць усё, што ў нашых сілах, каб дапамагчы ім.

Мы звяртаемся да Цябе, Хрыстэ. Да каго нам яшчэ ісці? Ты маеш словы жыцця. Мы просім Цябе суправаджаць усю Царкву і ўсё чалавецтва, якое перажывае свайго роду зыход, пераход да нечага іншага, пераход праз пустыню. Як і многія людзі, мы перажываем перыяд, калі не бачым дакладна, што нас чакае ў будучыні. Але Ты дазваляеш нам знаходзіць у Табе новыя рэсурсы і быць стваральнікамі адзінства. З даверам адмаўляем перад Табою малітву Псальма: “Спраў рук Тваіх не пакідай”.

А зараз, пасля сумеснага спеву да Святога Духа, тыя з братоў, якія склалі свае вечныя манаскія зарокі, на ўспамін сваёй ахвяры Богу, будуць ляжаць на зямлі ў жэсце прастрацыі.

Супольная малітва з Радай Цэркваў Блізкага Ўсходу

Сёлетняя тэма, якая была абрана Радай Цэркваў Блізкага Ўсходу: “Мы бачылі зорку Ягоную на ўсходзе і прыйшлі пакланіцца Яму”. Прапанаваная тэма, у прыватнасці чытанні з Бібліі і малітоўныя інтэнцыі, даступны ў сеціве пад гэтае спасылкаю.

Прачытайце або перачытайце “Прапановы на 2022 год”

Тытул сёлетніх Прапаноў Тэзэ на 2022 год: “Становячыся стваральнікамі адзінства”. Хрысціянскага адзінства асабліва тычыцца пятая з Прапаноў. Поўны тэкст Прапаноў знаходзіцца па гэтае спасылцы.

Перажыванне малітвы аб еднасці разам з Тэзэ

У аўторак 18 студзеня а 18-е гадзіне ў Тэзэ ў прысутнасці прадстаўнікоў розных канфесій адбылася малітва, на якую былі запрошаныя нашыя сябры з наваколіц. Запіс гэтае малітоўнае трансляцыі можна паглядзець на відэа.

Праслухайце падкаст з Тэзэ

Падкаст на гэтым тыдні ўяўляе сабой інтэрв’ю (на французскай мове) з пастарам Ан-Лораю Дане, адказнай за адносіны паміж хрысціянскімі Цэрквамі ў Пратэстанцкай федэрацыі Францыі. Гэтае інтэрв’ю можна паслухаць з асноўных падкаст-платформаў.

Прачытайце пасланні ўдзельнікам Сустрэчы ў Турыне

Як і кожны год, каталіцкія, праваслаўныя і пратэстанцкія лідэры дасылалі вітальныя пасланні удзельнікам Еўрапейскае Сустрэчы.

Паслухайце лекцыю брата Алоіса пра адзінства

Летась брат Алоіс быў запрошаны выступіць з працяглай прамовай аб адзінстве ў рамках серыі сустрэч, арганізаваных Папскім універсітэтам святога Тамаша Аквінскага, таксама вядомым як Ангелікум, у Рыме. Гэтую канферэнцыю можна знайсці ў сеціве па гэтае спасылцы (выступленне адбываецца па-італьянску; даступныя напісы па-французску).

Дарагія родныя і сябры,

у гэты дзень, калі арцыбіскуп Дэсманд Туту адыйшоў да вечнасці, мне б хацелася выказаць сваю сімпатыю, а таксама прыхільнасць усёй Супольнасці Тэзэ да вас, якія таварышылі яму падчас ягонага жыцця і змагання на працягу амаль шасцідзесяці пяці гадоў.

Дух Уваскрослага Хрыста зрабіў яго крыніцаю мудрасці і мужнасці для Паўднёвае Афрыкі ды рэшты свету ў самыя змрочныя гадзіны апартэіду, а таксама на працягу ўсяго шляху да справядлівасці і прымірэння ў вашае краіне.

Мы ўдзячныя за сяброўства, якое звязвала арцыбіскупа з нашае Супольнасцю больш за сорак гадоў. Ад часу візіту брата Ражэ ў Ёханэсбург у 1978 г. ды ягонага асабістага наведвання Тэзэ ў 1979 г. мы заставаліся з’яднаныя праз малітву, падзяляючы той самы запал адносна абуджэння новых пакаленняў маладых людзей да веры ў Хрыста. У 1980 годзе, калі ў вашае краіне была высокая напружанасць, ён арганізаваў падарожжа 144 маладых жыхароў Паўднёвае Афрыкі рознага паходжання, канфесій і сацыяльнае прыналежнасці ў пілігрымцы прымірэння да Тэзэ. З тых часоў ён аддана падтрымліваў сотні маладых жыхароў Паўднёвае Афрыкі, аддэлегаваных іх Цэрквамі, каб прадстаўляць сваю краіну на розных этапах Пілігрымкі Даверу, арганізаванай Тэзэ. Два гады таму яму вельмі хацелася далучыцца да ўдзельнікаў міжнароднае сустрэчы, якую мы падрыхтавалі ў Кейптаўне.

У сваім вітальным пасланні да ўдзельнікаў пілігрымкі Тэзэ ў Ёханэсбургу ў 1995 годзе ён напісаў: “Малітва стварае клімат, у якім мы можам сустракацца і ўзрастаць да ўзаемнае любові”.

Супольна з жанчынамі і мужчынамі добрае волі ва ўсім свеце, і асабліва з моладдзю з афрыканскага кантынента, мы дзякуем за яго жыццё і служэнне. Ён будзе працягваць натхняць тых, хто шукае справядлівасці і міру.

Падчас Сустрэчы Тэзэ ў Кейптаўне, 2019 г.

Дзякуй, Святы Ойча, за скліканне гэтага сінода. У Тэзэ мы былі вельмі кранутыя, што нас запрасілі на адкрыццё. Дзякуй таксама за традыцыю запрашаць дэлегатаў з іншых Цэркваў. Будзе вельмі істотна пачуць ад іх аб іх уласнае практыцы сінадальнасці з яе моцнымі бакамі, але й абмежаваннямі.

Гэты сінадальны працэс надыходзіць у вырашальны момант, калі мы з’яўляемся сведкамі дзвюх супярэчлівых падзей. З аднаго боку, чалавецтва ўсё больш выразна ўсведамляе, што ўсе мы звязаны адно з адным ды з усім стварэннем. З іншага боку, у сацыяльнае, палітычнае і этычнае сферах нарастае палярызацыя, што выклікае новыя падзелы ў грамадстве, паміж краінамі, а нават у сем’ях.

На жаль, паміж нашымі Цэрквамі, а таксама ўнутры іх, прагледжваецца тэндэнцыя да пераўтварэння існуючых розніц у палярызацыю, якая дзеліць людзей, і менавіта ў гэты час нашае сведчанне міру набывае жыццёва важнае значэнне.

Якім чынам мы можам прасоўваць хрысціянскае адзінства наперад? Наконадні я запытаўся пра тое ў пастара Лары Мілера, былога генеральнага сакратара Сусветнага хрысціянскага форуму. Ён адказаў: “Нядобра пачынаць са слоў: ‘Вось, кім мы з’яўляемся, і таму мы маем рацыю’. Будзе лепей прызнацца да ўласных слабасцяў і папрасіць іншыя Цэрквы дапамагчы нам атрымаць тое, чаго нам бракуе - гэта ўспрымальны экуменізм, які дазваляе нам прымаць тое, што зыходзіць ад іншых”. Ці ж бы гэты пастар не бачыў усё правільна? Усе мы нясем скарб Хрыста ў гліняных начыннях, і, бадай, ён прамянее больш выразна, калі мы пакорліва прызнаем тое, чаго нам не стае.

У самым нутры Каталіцкага Касцёла сінод выявіць вялікую разнастайнасць. Сінод будзе яшчэ больш плённым, калі адначасова паглыбіцца пошук еднасці. Тое неабходна не дзеля таго, каб пазбегнуць або схаваць канфлікты, але дзеля таго, каб узмацніць дыялог, які нас паяднае.

Каб заахвоціць да гэтага, на маю думку, пажадана, каб у Сінадальным шляху былі моманты, каб перавесці дыханне, нібы невялікія перапынкі, для таго каб запрыкмеціць адзінства, якое ўжо дасягнута ў Хрысце, зрабіць яго бачным.

У сувязі з гэтым, Святы Ойча, паколькі ты запрасіў нас памарыць, я хацеў бы падзяліцца з вамі марай. Ці існуе мажлівасць, што ў пэўны момант, падчас сінадальнага працэсу, на вялікі экуменічны сход могуць быць запрошаныя не толькі дэлегаты, але і ўвесь народ Божы, не толькі католікі, але вернікі з розных Цэркваў? Бо праз хрост і паводле Святога Пісання мы з’яўляемся сёстрамі і братамі ў Хрысце, аб’яднанымі ў супольнасці, якая пакуль яшчэ недасканалая, але ўжо цалкам рэальная, нават калі існуюць пакуль багаслоўскія пытанні, якія трэба будзе вырашыць.

Такі сход - тут, у Рыме, і адначасова ў іншых месцах на свеце - мог бы мець у цэнтры ўрачыстую цэрэмонію выслухання Божага Слова, з доўгай хвілінай маўчання і малітваю вернікаў у інтэнцыі супакою. Ці можна было б паверыць тое моладзі? Ці тая ўрачыстасць магла б быць працягнутая часам дзялення паміж удзельнікамі з розных канфесій? Тое магло б выявіць, што, з’яднаўшыся ў Хрысце, мы становімся міратворцамі.

Да гэтае прапановы мяне натхніла нашае дасвядчэнне з Тэзэ. У нашае Абшчыне, якая складаецца з розных канфесій, мы жывем пад адным дахам. Ужо больш за шэсцьдзесят гадоў мы прымаем маладзёнаў з розных Цэркваў, а таксама й тых, хто перабывае ў пошуках сэнсу свайго жыцця. Захоўваючы дыстанцыю да нейкага найбольш агульнага назоўніка, мы ўвесь час імкнемся ісці да крыніцы Евангелля, да ўваскрослага Хрыста, які праз Святога Духа вядзе нас разам да Таго, хто з’яўляецца Айцом усіх людзей без выключэння.

Здымак: Цілен Чэбуль (Tilen Čebulj)