Заява брата Алоіса

Стаючы ў праўдзе (з абнаўленнем ад 21.10.2019)

Аўторак, 4 чэрвеня 2019 г.

У той час, калі грамадства і Царква спрабуюць праліць святло на сітуацыю з сексуальным выкарыстаннем і нападамі, асабліва ў дачыненні да непаўнагадовых і далікатных асобаў, мае браты і я вырашылі, што таксама неабходна выказацца на гэтую тэму. Цягам дзесяцігоддзяў і аж да сёння ў Тэзэ мы прымалі тыдзень па тыдні тысячы маладых і не такіх ужо маладых людзей з Еўропы ды рэшту свету.

Маючы свядомасць нашае адказнасці і праўды, якую дэманструюць нам гэтыя маладзёны, іх сем’і ды кіраўнікі іх груп, мы заўсёды імкнуліся зябяспечыць, каб той прыём адбываўся ў найлепшых варунках, як толькі тое магчыма, з павагаю да перакананняў кожнае асобы ды глыбокаю ўвагаю да інтэгральнасці і бяспекі ўсіх прысутных.

Тым не меней, сярод удзельнікаў сустрэч, як паміж самімі маладымі людзьмі, так і паміж моладдзю і дарослымі, мелі месца сітуацыі парушэння гэтае інтэгральнасці. Калі мы былі інфармаваныя пра тое, мы выслухоўвалі ахвяры з адначасовым інфармаваннем адпаведных уладаў, як свецкіх, так і рэлігійных.

Сярод іншых мер, пачынаючы ад 2010 г. адна з нашых старонак [http://www.taize.fr/be_article25771.html] у сеціве была прысвечаная абароне асобы, дзе змешчаныя E-mail адрасы, па якіх можна звяртацца і паведамляць пра магчымыя злачынствы. Таксама у Тэзэ брат з іншымі асобамі з па-за абшчыны адказныя за выслухоўванне якой-кольвек асобы, якой сталі вядомыя прыклады нападаў сексуальнага кшталту ці пра любую іншую форму гвалту, асабліва ў дачыненні да непаўнагадовых. Сюды ўваходзіць таксама інфармаванне пра тое кожнага з удзельнікаў, што прыязджаюць да Тэзэ, на пачатку іх побыту.

Тое, чаму я сёння прамаўляю, дык таму, што з глыбокім смуткам даведаўся пра выпадкі, звязаныя з нашымі братамі, і, нават прымаючы да ўвагі даўнасць тых сітуацый, мы ў абшчыне пачуваліся з’абавязанымі паведаміць пра гэта. Гутарка пра пяць прыкладаў сексуальнага нападу на непаўнагадовых у перыядзе паміж 1950-ымі гг. ды 1980-ымі гг. з боку трох нашых братоў, два з якіх памерлі больш пятнаццаці гадоў таму.

Калі я быў паінфармаваны пра тыя напады, маёю першаю задачаю было выслухаць разам з іншымі братамі ацалелых*, з абсалютнаю павагаю да іх слоў, каб пачуць іх пакуты ды трываць з імі ў меру нашых магчымасцяў.

Балазе, у апошнія гады ў грамадстве ды ў Царкве ўсведамленне нанясення шкоды інтэгральнасці чалавека паглыбляецца. Гэта таксама знайшло сваё адлюстраванне ў французскім заканадаўстве, якое абавязвае інфармаваць пра кожны выпадак, незалежна ад таго, калі тое здарылася ў мінулым.

Працягваючы нашую працу па ўсталяванні праўды і папярэдне паразмаўляўшы з ацалелымі, я толькі што паінфармаваў французскага пракурора пра тыя пяць выпадкаў.

Мы прызнаем, што гэтыя напады, здзейсненыя нашымі братамі ў мінулым, таксама з’яўляюцца часткаю нашае гісторыі. Для нас такая пастава - частка спробы высветліць праўду, што пачалося ад выслухання пацярпелых, і аж да сёння нашыя думкі скіраваныя ў іх кірунку. Пачуўшы тое, што яны дасведчылі і як пакутавалі, мы адчуваем сорам і глыбокі смутак. Магчыма, што гэтая заява можа заахвоціць іншых магчымых ацалелых паведаміць пра свае сітуацыі. Мы выслухаем іх і будзем таварышыць ім у кроках, якія яны пажадаюць зрабіць.

Мы перакананыя, што выключна праліваючы святло на тыя ўчынкі пры адначасовай дапамозе асобаў з па-за абшчыны, мы будзем плённа абараняць усіх тых, хто аказвае нам свой давер, прыязджаючы да Тэзэ. І, калі я прамаўляю сёння, дык таму, што мы абавязаныя гэтым ацалелым, усім, хто побач з імі, а таксама ўсім тым, хто шукае ў Тэзэ даверу, бяспекі і праўды.

брат Алоіс


* Пасля перакладу дадзенага тэксту слова “ахвяры” было вырашана замяніць на “ацалелыя”.

Пра кожны выпадак агрэсіі супраць непаўнагадовых ці дарослых - новы ці даўні, - будзе гэта брат абшчыны, што злоўжывае сваім маральным статусам, ці нейкая іншая асоба, можна паінфармаваць братоў Абшчыны па адрасе: protection taize.fr альбо звязацца з арганізацыяй, якая займаецца дапамогаю ахвярам. Кантактная інфармацыя змешчаная на нашае старонцы ў сеціве [http://www.taize.fr/be_article25771.html].


Актуалізацыя з 19 ліпеня 2019 г.

Пасля заявы брата Алоіса 4 чэрвеня на электронную скрынку protection taize.fr напісалі некалькі асобаў. Гэта схіліла брата Алоіса да паінфармавання пракуратуры пра два абвінавачванні адносна сексуальнага выкарыстання непаўнагадовых, што мела месца ў 60-ых і 70-ых гг. Справа датычыць брата, які памёр больш дваццаці гадоў таму, а таксама брата, які выйшаў з Супольнасці больш сарака гадоў таму. Акрамя таго, іншыя атрыманыя сведчанні датычаць брата, пра якога ідзе гутарка ў ранейшае заяве, і які памёр больш пятнаццаці гадоў таму. Дадзеныя сведчаць пра злоўжыванне аўтарытэтам, што прывяло да дотыкаў інтымнага кшталту ў дачыненні да маладых поўнагадовых асобаў.


Актуалізацыя з 21 кастрычніка 2019 г.

Ад часу апублікавання зварота брата Алоіса “Стаючы ў праўдзе” 4 чэрвеня 2019 г., нядаўна прыёр Тэзэ атрымаў сведчанні пэўнай жанчыны з апісаннем сувязі з братам, якога яна абвінавачвала ў псіхічных, псіхалагічных і сексуальных дамаганнях, што трывалі цягам некалькіх гадоў аж да апошняга лета. Паводле яе слоў, кантроль з боку брата доўжыўся ад 2003 г., калі яна - маладая дзяўчына - прымала ўдзел у міжнародных сустрэчах Тэзэ.

Брат Алоіс неадкладна паведаміў пра гэта кампетэнтным органам, а жандармерыя сабрала паказанні пацярпелай. Брат, пра якога ідзе гутарка, зараз знаходзіцца пад вартаю; супраць яго высунутыя абвінавачванні ў “згвалтаванні і сексуальных дамаганнях”. Зараз справа за судом, дзе маюць быць устаноўленыя і кваліфікаваныя факты паводле законных падстаў.

Брат Алоіс сцвярджае: “Мы з братамі ў шоку. Мы зробім усё магчымае, каб на гэтую справу пралілася святло. Такое захаванне абсалютна несумяшчальна з нашым жыццём. Я застаюся на баку ацалелых, і мы зробім усё магчымае, каб падтрымаць яе. Я даручаю сябе вашым малітвам і вашай дружбе”.

Кожны, хто хоча пагаварыць пра гэтыя навіны з братамі, можа звязацца з Абшчынаю па тэлефоне +33 (0) 3 85 50 30 30. У самой вёсцы Тэзэ браты і сёстры, а таксама псіхолагі, якія не належаць да Абшчыны, могуць выслухаць людзей, што перабываюць на ўзгорку і хочуць паразмаўляць пра тое.

Каб працягнуць працу па высвятленні ісціны, Абшчына зноў заяўляе, што былі прыняты розныя меры для атрымання дадатковых справаздач, у тым ліку па электроннай пошце protection taize.fr.


Калі вы жадаеце зарэагаваць на дадзеную публікацыю, вы можаце скарыстацца ніжэйшае формаю.



Інтэрв’ю для La Croix - чэрвень 2019 г.

Адказы брата Алоіса на пытанні французскага штодзённіка La Croix у інтэрв’ю пад назваю: «Мы абавязаныя маладзёнам, што прыязджаюць да Тэзэ, распавесці праўду».

(Пытанні задавала журналістка Anne-Bénédicte Hoffner).

- Якія крокі Вы зрабілі, калі даведаліся пра сексуальныя напады з боку братоў?

  • Брат Алоіс: Па-першае, калі мяне паінфармавалі, я разам з іншымі братамі выслухаў ахвяр, з абсалютнае павагаю прымаючы іх словы, каб адчуць іх пакуты. Ахвяры не хацелі, каб іх паказанні былі перададзены органам справядлівасці, таму мне падалося, што прыярытэтам для нас будзе слухаць іх і як мага лепш таварышыць іх. З многімі з іх мы змаглі падтрымліваць сувязь ці нават прыняць іх у Тэзэ. Мяне ўразіла, што ў іх нешта вызвалілася, як толькі іх словы ўспрымаліся сур’ёзна. Яны былі здзіўлены, што я веру ў іх паказанні; яны не чакалі гэтага.

- Чаму сёння Вы вырашылі скіраваць тыя справы да адпаведных органаў?

  • Брат Алоіс: Слухаючы пацярпелых, я вымераў цяжар любога сексуальнага нападу, любога парушэння недатыкальнасці. І толькі з дапамогай гэтага суправаджэння я зразумеў іх глыбокую патрэбу ў справядлівасці, у тым, каб тое можна было вылечыць. Гэта пераканала мяне ў неабходнасці ісці далей. У панядзелак, 3 чэрвеня б.г., я паведаміў дзяржаўнаму пракурору пра такія сітуацыі з удзелам братоў нашае Абшчыны.

- Ці гутарка пра згвалтаванне?

  • Брат Алоіс: Не, наколькі мне вядома, згвалтавання ніколі не было. Але гэта аніякім чынам не мінімізуе пакуты ахвяр. З гэтага часу гэтыя факты знаходзяцца ў руках пракурора, які адказвае за іх кваліфікацыю.

- Ці паведамілі вы ахвярам пра свой падыход да правасуддзя?

  • Брат Алоіс: Так, мы загадзя звязаліся з імі, каб паведаміць ім пра гэты крок ставання ў праўдзе. Яны далі нам сваю згоду.

- Ці падзяляе ўся Абшчына братоў Вашую паставу наконт неабходнасці гэтага судовага працэсу?

  • Брат Алоіс: Я адчуваў, што магу разлічваць на сталасць Абшчыны, і што гэтая сталасць дазваляе і нават патрабуе гэтага кроку. Калі я падзяліўся з братамі сваім жаданнем высветліць сітуацыю пры дапамозе суда, мы разважалі тое ў невялікіх групах, звязваючыся з нашымі братамі, якія жывуць у нашых брацтвах за мяжой. Мы, канечне, былі занепакоеныя наступствамі, але ніхто не выказваў нежадання. Нават, калі нам тое будзе каштаваць, рашэнне паведаміць пра факты пракурору было прынятае хутка. Неўзабаве мы таксама зразумелі важнасць ставання ў праўдзе з нашымі блізкімі, а таксама дзясяткамі тысяч маладзёнаў і дарослых, якія штогод прыязджаюць у Тэзэ. Ім мы таксама абавязаныя, бо атрымалі праўду пра гэтыя чыны агрэсіі, якія з’яўляюцца часткаю нашае гісторыі. Маладыя людзі нам давяраюць: гэта велізарная адказнасць, і мы ў вёсцы на ўзгорку не павінны мець невыкананага слова. Я ведаю, што гэтая навіна моцна пашкодзіць, але я хацеў бы, каб мне пра тое расказалі. Асабліва я спадзяюся, што такі падыход, які мы абавязаныя ахвярам ды іх сваякам, дапаможа пазбегнуць ілжывай ідэалізацыі і дазволіць моладзі працягваць знаходзіць у Тэзэ месца даверу, месца, дзе іх могуць выслухаць. Гэтым крокам мы хочам зрабіць свой унёсак у справу ставання ў праўдзе ў Царкве.

Інтэрв’ю з KNA (Каталіцкае агенцтва навін Нямеччыны) - чэрвень 2019 г.

(Пытанні задаваў Volker Hasenauer)

- Ваша Абшчына выставіла абвінавачванні ў дачыненні да трох братоў. Наколькі Вы можаце быць упэўнены, што зараз у Тэзэ няма выпадкаў сексуальнага гвалту?

  • Брат Алоіс: Мы не можам быць абсалютна ўпэўненыя ў гэтым. Але ўжо ў 2010 годзе мы стварылі адрас электроннае пошты, па якім людзі могуць паведамляць пра магчымыя інцыдэнты. Тое, што мы толькі што апублікавалі, можа падштурхнуць іншых паведамляць пра здарэнні. Шляхам кантактаў з зацікаўленымі бакамі мы даведаліся, наколькі важна для некага быць выслуханым без пастаўлення папярэдніх умоў, не ставячы пад сумнеў іх словы.

- Чаму пра тыя напады так доўга нічога не было вядома, чаму Вы абнародуеце іх толькі цяпер, калі ўжо ў 2010 г. былі першапачатковыя паказанні?

  • Брат Алоіс: Маім першым клопатам было выслухаць пацярпелых з поўнае павагаю да іх слоў. Мы хацелі паказаць ім, што мы сур’ёзна паставіліся да таго, што з імі здарылася. У той жа час зацікаўленыя асобы не жадалі публікаваць факты. Але з цягам часу стала больш зразумела, што мы не маглі спыніцца на дасягнутым. Мы абавязаны ў гэтым перад ахвярамі ды іх сем’ямі, а таксама перад тымі ўсімі, хто нам давярае і хто прыязджае з моладдзю ў Тэзэ.

- Двое з абвінавачаных ужо памёрлі. Ці можа трэці, хто абвінавачваецца, заставацца членам вашае Абшчыны?

  • Брат Алоіс: Брат, пра якога вядзецца гутарка, доўгі час не выконваў аніякіх роляў падчас моладзевых сустрэч. Але ён не можа жыць адзін, таму мы па-ранейшаму нясем за яго адказнасць.

- Як Вы можаце быць упэўненыя, што не будзе паўтору правапарушэнняў?

  • Брат Алоіс: Калі мне стала вядома пра абвінавачванні, я прыняў шэраг крокаў, акрамя беспасрэдных кантактаў з пацярпелымі, каб далей абараніць бяспеку і недатыкальнасць тых, хто нам давярае. Сярод іншага, у нас даўно было правіла весці асабістыя размовы толькі ў месцах, прадугледжаных для гэтай мэты, якія адкрыты для прагляду. З кампетэнтнымі людзьмі з па-за Абшчыны мы разважалі - і працягваем гэта рабіць й сёння - пра тое, што мы маглі б зрабіць, асабліва ў галіне кантактаў з лідэрамі, якія прывозяць групы ў Тэзэ, а таксама ў сферы фармацыі нашых братоў.

- У якой ступені гэтыя выпадкі падрываюць прагненне Тэзэ быць адкрытым і мірным месцам малітвы і абмену для моладзі са ўсяго света?

  • Брат Алоіс: Гэта праўда, што многія маладыя людзі нам вельмі давяраюць. Таму гэтыя выпадкі з мінулага даволі сур’ёзныя. Але мы перакананыя, што мы можам быць месцам даверу толькі шляхам адкрытага вырашэння падзей. Гэта таксама можа дапамагчы людзям не ідэалізаваць Тэзэ і нас, братоў: мы прагнем, каб сустрэчы былі асаджаныя ў рэальнасці, каб моладзь працягвала знаходзіць у Тэзэ месца сапраўднае сустрэчы і даверу.

Printed from: http://www.taize.fr/be_article26177.html - 20 November 2019
Copyright © 2019 - Ateliers et Presses de Taizé, Taizé Community, 71250 France