TAIZÉ

Апошнія навіны

Брат Мэцью прыняты на прыватнай аўдыенцыі ў папы Францішка

У панядзелак, 18 сакавіка, брат Мэцью, упершыню пасля таго, як ён стаў прыёрам Супольнасці Тэзэ, быў прыняты на прыватнай аўдыенцыі папам Францішкам.

Падчас абмену думкамі брат Мэцью падзякаваў папе Францішку за яго служэнне ў якасці біскупа Рыма і падзяліўся глыбокае ўдзячнасцю многіх хрысціян з розных Цэркваў за сустрэчу “Разам” | Сход народа Божага 30 верасня, у прыватнасці за апошняе дабраслаўленне, якога пантыфік удзяліў сумесна з дваццаццю духоўнымі лідарамі.

Акрамя таго згадваліся Еўрапейскія сустрэчы ў Любляне напрыканцы снежня 2023 г. і сустрэча, якая цяпер рыхтуецца ў эстонскім Таліне напрыканцы снежня 2024 г., а таксама запрашэнне брата Мэцью ў гэты перыяд вялікіх пакут у многіх месцах свету стаць «пілігрымамі супакою».


Дайджэст навін

□ Перад прыбыццём у Рым у Асізі брат Мэцью разам з двума іншымі братамі з Супольнасці ўдзельнічаў у экуменічнай канферэнцыі на тэму «Свята стварэння, таямніца стварэння», падчас якой ён выступіў падчас першай панэлі пад назвай «Экуменічны кайрос — урадлівая глеба для свята стварэння».

□ У мінулую сераду брат Мэцью і Супольнасць прымалі ў Тэзэ біскупаў Евангелічна-Лютэранскай Царквы Фінляндыі, якія знаходзіліся ў Жэневе з экуменічным візітам.

□ У рамках акцыі «пілігрымы супакою» моладзь, сёстры святога Андрэя і браты з Тэзэ ў чацвер, 7 сакавіка, прайшлі 34 км пешшу з Тэзэ, каб сімвалічна адзначыць адлегласць паміж гарадамі Газа і Рафах, молячыся падчас чатырох стацый за тых, хто пакутуе ў розных месцах свету.


Інфармацыя для СМІ

  • ·Падчас свайго знаходжання ў Рыме брат Мэцью сустрэнецца з журналістамі на нефармальным сняданку. Калі вы хочаце прыняць удзел, вы можаце напісаць як мага хутчэй на адрас secretariat taize.fr.
  • · Калі вы жадаеце атрымліваць прэс-рэлізы, якія дасылаюцца журналістам і СМІ чатыры разы на год, падпішыцеся, напісаўшы на адрас media taize.fr.

Лютэранскія біскупы Фінляндыі наведалі Тэзэ

У сераду, 13 сакавіка 2024 г., брат Мэцью і Супольнасць былі рады прывітаць у Тэзэ біскупаў Евангелічна-Лютэранскай Царквы Фінляндыі.

Біскупы знаходзіліся ў Жэневе ў рамках экуменічнае азнаямленчае паездкі. Яны прысутнічалі на паўдзённае малітве ў Тэзэ і абедалі з Абшчынаю. У другой палове дня яны разважалі з братамі на тэмы царкоўнага адзінства, выслухоўвання і дыялогу, а таксама будучае Еўрапейскае сустрэчы ў Таліне – горадзе, які знаходзіцца ў 82 км ад Хельсінкі, у двух гадзінах падарожжа на пароме.

Нарада ў Супольнасці | Малітва брата Мэцью

Як і кожны год, на мінулым тыдні браты адбылі нараду ў Супольнасці.
Нарада завяршылася нядзельным вечарам супольнае малітваю са знакам ахвяравання ўласнага жыцця, якім браты ўспамінаюць дзень сваіх манаскіх зарокаў. На пачатку брат Мэцью прачытаў наступную малітву.


Заключная малітва

Хвала табе, верны Божа.

Мы дзякуем табе за тое, што ты заклікаеш нас – братоў у нашае Абшчыне – супольна крочыць, з нашай беднасцю, але таксама поўных радасці з-за разнастайнасці нашых дароў, нашага паходжання і спадчыны.

Мы дзякуем табе, што ты чуваеш над намі ў гэты пераходны перыяд нашага супольнага жыцця.

У гэты вечар мы асабліва дзякуем табе за гэты тыдзень цішыні, малітвы і разважанняў падчас нарады, якую ты даў нам перажыць.

Мы дзякуем табе за жыццё нашых братоў П’ер-Іва, Паскаля і Марка, якія далучыліся да цябе ў святле вечнасці. Мы дзякуем табе за новых братоў, якія сёлета далучыліся да нас, і за братоў, якія склалі манаскія зарокі, узяўшы на сябе абавязак на ўсё жыццё. Мы даручаем табе ўсіх нашых братоў, дзе б яны ні былі на сваім шляху. Будзь нашай надзейнай падтрымкай.

Дзе б мы ні былі, у Тэзэ ці дзе-небудзь яшчэ, спашлі на кожнага з нас твайго Святога Духа, каб усё больш і больш адраджаць запал да еднасці, унутранае перакананне, якое падсілкоўваецца малітвай Езуса за сваіх сяброў: каб яны былі адно, каб свет мог паверыць.

Дапамажы нам зразумець заклік, які ты сёння скіраваў да нас, і быць сведкамі еднасці ў нашым супольным жыцці, у камуніі Цела Хрыста, якім з’яўляецца Царква, і ў параненым Стварэнні, часткай якога з’яўляюцца падзелы чалавецтва.

Учыні, каб кожны з нас знайшоў уласцівы баланс у сваім жыцці і падтрымліваў адзін аднаго ў братэрскай любові.

Учыні, каб мы заўсёды ішлі шляхам малых, крочылі за Езусам, які дзень за днём ідзе перад намі, каб крочыць разам з Ім.

Дабраславёны ты, верны Божа, крыніца жыцця.


Запіс малітвы ў простым эфіры

Тыдзень малітваў аб адзінстве хрысціянаў

Як штогод, з 18 па 25 студзеня будзе праходзіць Тыдзень малітваў аб адзінстве хрысціянаў. Усіх нашых сяброў з наваколля мы запрашаем прыбыць у Тэзэ ў чацвер, 18 студзеня, на супольную малітву а 18-ае гадз., а пазней застацца на пачастунак.

Перад гэтым, а 17:00 у пак. №15 усе ахвотныя запрашаюцца на сустрэчу з братам Мэцью, прыёрам Абшчыны Тэзэ.

Увага: з гэтае нагоды супольная вечаровая малітва 18-га студзеня перанесена на 18:00 замест 20:30, як тое адбываецца звычайна.

 [1]

Разважанне бр. Мэцью на Раство Хрыстова

Сардэчна вітаем усіх вас, хто ў гэтую калядную ноч прыехаў з наваколля Тэзэ, калі мы святкуем Нараджэнне Езуса. Разам з братамі мы вельмі цешымся прывітаць вас тут, у Храме Паяднання. Напрыканцы Эўхарыстыі нашыя свечкі мы запалім святлом, якое прыбыло з Бэтлеема і якое гарыць зараз у гэтым ліхтары. Потым выйдзем на вуліцу і заспявайма перад яслямі каля Храма.

Мы толькі што пачулі Евангелле аб нараджэнні Езуса. Гэта добра вядомая гісторыя для многіх з нас, але што яна павінна сказаць нам сённяшнім вечарам? Для мяне гэта гісторыя, якая прапануе нам некалькі калядных падарункаў. Я магу прыгадаць тры дары, якія мы можам атрымаць, слухаючы гэта, дары, якія Бог дае кожнаму з нас. Магчыма, вы адкрыеце таксама іншыя, калі будзеце перачытваць тую гісторыю.

Першы дар – «радасць». Там пастухі; яны не прывілеяваныя людзі; ім даводзіцца начаваць на вуліцы са сваімі авечкамі. Гэтым бедным людзям анёл, пасланнік Бога, абвяшчае «вялікую радасць» не толькі для іх, але і для ўсіх людзей: добрую навіну, якою можна падзяліцца. Пастухі, у сваю чаргу, стануць пасланцамі Бога.

Гэтая «вялікая радасць» будзе таксама радасцю сяброў Езуса напрыканцы Евангелля. Яна напоўніць іх сэрцы пасля смерці і ўваскрасення Хрыста. Радасць можа прыйсці на свет, калі мы праходзім праз цяжкасці. Якую радасць гэтымі днямі атрымліваю я? Як падзяліцца гэтым з іншымі?

Другі дар называецца «мір». Убачыўшы Божага пасланца, пастухі былі ахоплены вялікім страхам. Так і мы, можам быць ашаломлены, калі ўсведамляем, што Бог поруч. Але анёл кажа: «Не бойцеся». І тады цэлае неба спявае аб супакоі, які Бог прапануе ўсім жыхарам зямлі, якіх Ён любіць, без выключэння.

Супакой, які пастухі атрымліваюць у сваіх сэрцах, павінен ззяць вакол іх. Адзін з ранніх сведак Хрыста сказаў: “Пачніце працу супакою ўнутры сябе, каб, знайшоўшы супакой, вы маглі прынесці супакой іншым”. Разважаючы пра насілле ўнутры нас саміх, у нашых грамадствах і ў нашым свеце, на чым палягае мая адказнасць за гэты супакой, які Бог абвяшчае і давярае нам?

Трэці дар я б назваў «навізной». Нараджэнне Езуса – гэта нешта абсалютна новае ў гісторыі чалавецтва. І самае дзіўнае для нас, як і для пастухоў, тое, што Бог выбірае сустрэчу з намі ў той сітуацыі, у якой мы знаходзімся. Бог ужо не далёкі, але побач з намі. Бог прысутны, вельмі слабы, сціплы і бедны ў Дзіцяці Езусе, які залежыць ад Марыі, Яго маці, ад Юзафа ды іншых асоб вакол Яго. І ён таксама давярае сябе нашай апецы.

Калі штосьці новае, то яно часта бывае нетрывалым. Тое неабходна прыняць, клапаціцца аб гэтым і падтрымліваць. І ўсё ж кожная новая рэч з’яўляецца часткаю гісторыі. Не выпадкова евангеліст пачынае сваё апавяданне аб нараджэнні Езуса з размяшчэння яго сярод надзённых падзей таго часу. У нашым досведзе жыцця, у якім мы запрошаны распазнаць сляды Бога, узнікае нешта новае.

Чым жа з’яўляецца навізна, якую Бог просіць нас прыняць у гэтую ноч Нараджэння Пана і падчас гэтага Раства? Нават калі яна далікатная, як мы можам стварыць прастору, дзе можам падсілкоўваць яе і даць ёй магчымасці ўзрастання?

Прымем жа гэтыя тры дары ад Бога: радасць, мір і навізну. Пасля гэтага мы можам прапанаваць іх таксама й іншым; сваім уласным узорам жыцця. Магчыма, гэта можа быць той выклік, які Раство ставіць перад усімі намі...


Трансляцыя ўрачыстай цэлебрацыі з Тэзэ

Ніжэй запіс Эўхарыстыі з вігіліі Нараджэння Пана, трансляцыя якой мела месца нядзельным вечарам, 24 снежня, а 20:30 (а 22:30 часу беларускага).